政情：陳健波打硬仗前驗眼罕有缺席財會
立法會財務委員會主席、保險界議員陳健波（波哥）自從接掌財委會，向來甚少缺席會議，不過，尋日四小時會議就唔見波哥身影，全程由財委會副主席田北辰（田二少）擔正主持，認真耐人尋味，據知波哥係趁修改財委會會議程序前去驗眼，果然要以最佳狀態面對呢場硬仗喎！
心繫會議 主動問進度
波哥接受查詢時都心繫財會，主動問及財會進度，佢其後透露，因應尋日會議審議嘅項目爭議性唔大，加上田二少可以幫手主持會議，所以自己先安心去接受檢查。波哥仲明言對田二少主持會議有信心，所以唔使隔空望實會議情況，而自己事前已聽聞，田二少一早做足功課，問定點樣應對有人提出規程問題。對於今次驗眼檢查，波哥話去到一定歲數就要定期接受身體檢查，而今次驗眼係因為早前曾經眼爆微絲血管，好彩醫生就話無乜事。
講番尋日財會嘅進度，合共四小時會議通過咗三個項目，包括涉及超過廿六億元嘅安達臣道石礦場道路改善及基礎建設工程、約五億元嘅康文署開發全新智能康體服務預訂資訊系統。