政情：梁家傑楊岳橋反DQ亂噏倒米捱轟

引喻失義 梁頌恆狂轟

近日DQ傳聞鬧得火熱，而本身為資深大律師嘅前立法會議員梁家傑尋日就喺Facebook發文，指姚松炎宣誓詞內容溫和，而周庭亦從未發表過港獨言論，認為佢哋同前年立法會宣誓時「宣獨」嘅青年新政游蕙禎同梁頌恆嘅情況唔同，所以姚周唔應該遭到DQ，否則係違反《公民權利和政治權利國際公約》。不過，梁頌恆隨後就於Facebook作出反擊，質疑梁家傑所言係咪代表《公民權利和政治權利國際公約》選擇性唔保障佢喇。

楊變相要自決派認衰

除咗梁家傑，同屬公民黨嘅立法會議員楊岳橋談及反DQ時，更進一步撥火，佢喺電台節目上反問點解有人知錯，誠心悔改，甚至肯去跪玻璃，但都唔能夠重新經補選入閘喎。不過，眾所周知，本土自決派過去都未曾認過錯，加上「言者無心，聽者有意」嘅道理，楊岳橋此舉形同向本土自決派暗示，若然要於補選成功入閘，就要公開認錯，本土自決派究竟有冇人會聽楊指揮，答案真係不言而喻。

查實民主派同本土自決派嘅牙齒印點止咁少，話說民協前立法會議員馮檢基早前喺本土自決派圍攻下，被迫放棄做民主派嘅九龍西補選中「Plan B（後備人選）」，令到喺初選包尾嘅民主黨袁海文由「Plan C」升呢有望頂替將被DQ嘅姚松炎，但不消一會，呢個布局又引起本土自決派不滿喇。據報前學聯常委司徒子朗喺Facebook發文狙擊袁海文，更公開呼籲有志之士參選九龍西，擔任「真‧Plan B」，更豪言冇人選我選，認真火藥味甚濃。

平心而論，民主派由團結為立法會補選搞初選，轉變到內訌逼退馮檢基，再走到同本土自決派對立，呢個轉變真係嚟得快，再咁落去，睇怕大家都會愈走愈遠，睇嚟非建制派幾大山頭都各懷鬼胎，要做到團結並將槍口對外，真係天方夜譚！

除咗周庭，已報名參加香港島補選嘅仲有新民黨南區區議員陳家珮，同報稱無政治聯繫嘅任亮憲；至於九龍西補選，除咗姚松炎，仲有民建聯深水埗區議員鄭泳舜，同埋報稱獨立嘅蔡東洲。