中環出更：孔教學院喜宴士族婚禮首現香江
中西式婚禮大家見得多，似乎都大同小異。香港孔教學院（學院）院長湯恩佳女兒湯惠心，與學院常務副院長吳漢良大仔、粵港澳大灣區青年總會主席吳學明前晚結婚，就採取香港首見嘅古代士族婚禮，場面十分壯觀，賓客都起晒身影相、錄影，似足睇拍歷史古裝戲咁開心。
新老爺吳漢良笑稱，親家湯恩佳喺外地主持過漢族婚禮，但佢就從來未見過。今次吳湯聯婚可以喺香港首次重現中國古代盛大隆重嘅婚禮，宏揚中華文化，感到好雀躍。當晚好多政商界老友都爭住同佢合影留念添。
名書法家揮毫增添雅興
湯恩佳就話，全世界最多嘅人係中國人，佢覺得中華民族文化應該要保持落去，仲笑笑口話，時下年輕人鍾意將頭髮染到啡啡黃黃，遲啲就輪到金髮外國人染黑頭髮喎！
當晚去飲嘅中港名流多到數唔晒，包括宗教界、體育文化界及政商界。婚宴布置中西合璧，現場仲備有紙筆墨水供賓客題詞祝賀一對新人。有「天下第一虎 」之稱嘅內地知名畫家馮大中、中國書法家協會香港分會主席施子清都現場揮毫，令婚禮更添雅興。
黃特平贊助部分靚紅酒
卓妮見博愛醫院前總理黃特平同馮大中十分老友，其中黃特平本身係澳洲酒莊莊主，好鍾意收藏名家字畫，亦係孔教學院副院長，所以當晚大力贊助部分靚紅酒。當問及點解鍾意孔子文化？黃特平爽快笑答自己係山東人，梗係支持山東老鄉孔子啦！
卓妮