淫媒賣仔多疑雲 證監唔好瞌眼瞓

最簡單一樣嘢，根據漢奸黎洋助手Mark Simon嘅講法，收款銀行係本地一間著名銀行，佢又提到集團嘅廣告業務被杯葛，淫媒及漢奸黎多個戶口更曾被取消，暗示有人「政治打壓」，但相關銀行矢口否認處理過相關交易所涉及嘅電匯程序。事件鬧出不同版本，到底邊個真邊個假，連證券界老行尊都（抓）晒頭，淫媒有必要盡快交代清楚。

唔好唔記得，淫媒今個月初發表公告，實牙實齒話已經完成出售《壹週刊》香港業務，仲話買方已向賣方支付約一億元以及歸入餘下資產嘅再一筆初步保證金。依家又話銀行過唔到數，收唔到錢，點止自打嘴巴，更令人疑竇頓生。正如有法律界人士質疑，既然找唔到數，何來完成交易？仲有，壹淫媒因乜解究拖延超過兩個禮拜至對外公布，當中有咩不可告人嘅秘密？

有人就心水清嘞，知道凡係交易涉及到政治人物或從事敏感行業嘅人士，銀行會進行更嚴格嘅審查，尤其涉及大額跨境匯款時，更會要求客戶詳細解釋資金來源，一旦銀行認為未能釐清又或者懷疑涉及洗黑錢風險，禁止匯款甚至取消客戶帳戶都係通行做法。嗱，漢奸黎同壹淫媒個底有幾乾淨，相信唔使多講，成件事到底係好似有人所暗示嘅「政治打壓」，抑或因為自己身有屎，佢哋自己雞食放光蟲──心知肚明。

本來呢，買賣嘅嘢你情我願，有人甘願接爛貨跳火坑，旁人無從置喙，之不過涉及上市公司咯喎，咁就唔同講法喇。大家有眼睇，壹淫媒長期經營不善，虧損嚴重，股價好似玩激流咁飛墮三千呎，但自舊年下半年傳出放售壹仔後，股價一度回光返照，飆升至五毫九嘅高位，相較尋日收市跌至三毫六，期間波幅接近四成咁多，如果有人大玩財技上下其手，條數認真襟計。反過嚟講，假如有小投資者誤信壹淫媒之前「完成交易」嘅公告而大手入貨，家陣損手爛腳，你話邊個孭鑊先？

一句講晒︰「淫媒賣仔多疑雲，證監唔好瞌眼瞓。」既然《壹週刊》賣盤咁多蹺蹊，市場咁多質疑之聲，唔該證監部門打醒十二分精神，揸正嚟做，保障市場公正透明，唔好話畀人聽又有人玩包庇放生，漢奸黎又有保護傘罩住吖！