政情：長跑消耗大 王威信無玩
元朗區議會副主席王威信（Wilson）涉獵範圍廣泛，除咗要兼顧地區同律師工作，更係港超球會陽光元朗足球會會長，同香港足球關係密切。不過，咁唔代表Wilson對所有運動都咁大興趣，好似啱啱過咗嘅「渣馬」長跑，佢就話無玩喇，唔通佢體能欠奉而避戰？
其實體能對踢開波嘅Wilson嚟講並唔係問題，佢仲話玩長跑唔使特訓，相反跑開步嘅朋友去踢波仲會喘晒氣添，所以佢絕對唔係應付唔到長跑喎。佢進一步解釋，話玩完長跑後行路慢咗，身體又特別酸軟，需要幾日時間先回復得到，直言付出嘅代價太大，所以對長跑說不啫！
推介去元朗大棠跑
不過，Wilson喺廿幾年前，即剛投身社會時玩過長跑。佢認為跑步成本較低，而且場地簡單，若然有志同道合嘅朋友一齊玩係唔錯嘅運動，仲認為可以喺地區層面組織跑步隊咁話，而元朗空氣較市區好，佢就推介跑去大棠嘞！