政情：騸雞換眼鏡形象「繩」神

立法會前議員單仲偕（騸雞）離開議會後，享受住周圍旅行嘅退休生活。近日見到佢精神飽滿，但就換咗眼鏡，仲用埋眼鏡繩添！呢個形象都新鮮喎。

(先刂)雞喺舊年突然出現視網膜脫落，需要接受手術治療，搞到要將所有眼鏡換過晒喎。佢仲透露，現時除咗戴緊嗰副眼鏡外，褲袋仲會另備一副眼鏡，專係用作睇近嘢先用嘅，至於條眼鏡繩，就係要避免唔見眼鏡囉！騸雞現時經常要又除又戴眼鏡，又的確幾易會整唔見眼鏡嘅，難怪要好似啲小朋友咁，用條眼鏡繩綁實喇！

雖然騸雞眼部出現問題，但無阻佢遊山玩水嘅雅興。佢透露，將會喺農曆新年期間去帛琉潛水，今次嘅目標係睇水母，而較早前佢都去咗潛水睇魔鬼魚，生活相當充實。佢仲話退休除咗玩潛水，仲會去滑雪添！