中環出更：孭紅白藍袋坐單車尾 李鋈麟扽到籮柚爛
講起香港特色懷舊物品，一定唔少得紅白藍膠袋。早前東華三院舉行一百四十七周年慈善晚宴，就以「紅白藍．香港風」為主題，唔止出席嘉賓衣着要以紅、白、藍色為主，仲有以「紅白藍」為主題嘅時裝表演添。不過講起紅白藍袋，東華三院主席李鋈麟就有段「慘痛」經歷，話曾經試過孭住一兩個紅白藍袋，坐人哋單車尾坐足兩個鐘，扽到籮柚都爛咁話。
李鋈麟話細個嘅時候，由於鄉下嘅物資冇香港咁充裕，所以每逢同屋企人返鄉下，屋企人都會用紅白藍袋裝滿一袋二袋咁拎返去。因為鄉下偏遠，所以要搭兩個鐘單車先到，佢就咁樣孭住紅白藍袋坐單車尾扽足兩個鐘喇！雖然過程係好辛苦，但李鋈麟就話當啲物資送到去親友手中，見到親友嘅開心樣，佢就即時乜嘢辛苦都唔記得晒喇！
王賢誌做藝人夢想成真
當晚出席嘅仲有本身係晚宴籌委會主席嘅東華三院第一副主席王賢誌（Vinci）、第四副主席譚鎮國同太太許詠瑜、前任主席馬陳家歡同老公馬浩文，囡囡馬思齊仲有份行Catwalk表演添！Vinci話細個時父母都要返工，所以佢都好少有得出街，成日留喺屋企睇電視，漸漸想成為電視中人，依家成為藝人總算夢想成真。
馬陳家歡懷念街邊小食
講起小時候，馬陳家歡就特別懷念街邊小食例如魚蛋、豆腐花，佢話因為媽媽唔畀買，所以都係放學返屋企時偷偷買嚟食，仲要「收買」當時湊佢嘅媽姐一齊食，咁就唔怕媽媽鬧喇！而許詠瑜話自己細個好乖嘅，不過就唔似依家啲小朋友咁，讀書壓力咁大。大學時修讀兒童心理學嘅佢就話，覺得小朋友應該係喺開心嘅環境下成長，所以佢成日都會喺屋企陪囝囝玩喎。
卓妮