咪以為僭建係權貴專利，查實僭建無分貴賤，好似臭名遠播嘅深水埗通州街天橋底吖，被人僭建咗二百幾間棚屋仔，大部分被南亞假難民霸佔，淪為南亞村，搞到烏煙瘴氣，睇見都眼冤。
話口未完啫，警方又喺上址搗破一個由棚屋搭建嘅武器庫嘞，兩名南亞漢同埋兩名本地男子被捕，仲起出東洋刀、壘球棍及利刀添。呢個棚屋足足二百呎咁大，唔止有齊梳化傢俬，仲鋪埋地氈，簡直係五星級享受。至於呢批架生，唔使問都知，梗係黑幫用嚟開片尋仇霸地盤喇，呢排西九龍成日有南亞兵團暴力生事，甚至有良家婦女慘遭淫辱，就知佢哋幾咁猖獗。
話時話，大家一定記得呢個天橋底唔係第一次出事嘞，去年底警方先至直搗黑幫開壇收o靚儀式，檢獲一個「壇」、黃紙、利刀同埋黑幫入會儀式手冊。原來黑幫為咗吸納膽正命平嘅南亞假難民充當爛頭蟀，日光日白開壇燒黃紙斬雞頭，根本當警方透明。咁仲唔止，上址亦先後被警方檢出武器及毒品，有人話天橋底好似九龍寨城，黃賭毒遲早一條龍，一啲都冇誇張o架。
好哋哋嘅公眾地方搞到藏污納垢，生人勿近，講到底都係拜政府部門隻眼開、隻眼閉所賜。鬼咩，南亞假難民初來乍到，無處可去咪周街瞓囉，一傳十、十傳百，通州街天橋底就係咁淪為南亞露宿者之家，招徠黑幫插旗收o靚就係咁解。本來呢，多達六個政府部門可以處理上址問題，包括地政總署、康文署、食環署、路政署、民政事務總署以及社署，但六個和尚冇水飲，政出多門嘅結果必然係你推我讓，互相扯皮，卒之變成無王管地帶。單靠警方單打獨鬥始終唔係辦法，南亞兵團掃之不盡又有乜出奇。
當然喇，假難民之所以前赴後繼湧嚟香港，更深層原因係港府一味效婦人之仁，中門大開。喺假難民眼中，香港遍地黃金，唔講勾結黑幫食大茶飯呢筆，淨係講打黑工嗰筆都夠爽喇，就算被拉上法庭，只要遇着個仁慈法官，隨時博到大筆人道賠償，衣錦還鄉，唔知幾威水。更惡頂係一班偽善政客手指拗出唔拗入，幫啲假難民鳴冤喊屈攞錢攞福利攞到盡，佢哋請客，納稅人埋單，你話香港有乜法子唔淪為假難民天堂吖。
睇到喇，家陣南亞幫呢個治安毒瘤已呈尾大不掉之勢，各政府部門仲係唔嗲唔吊懶懶閒，唔通真係要全港十八區都「九龍寨城化」先至安樂？一句到尾，港府必須退出國際公約或重設禁閉營，徹底斬斷假難民來港誘因，繼續同呢班瘟神講大愛包容喎，盞自取其辱嘅咋。