政情：陳家強自爆有學生唔識佢

又話依家教書好開心

Vincent就話參選主打反拉布，拉布浪費好多公帑，批評有啲人玩政治為咗達到政治目的，佢希望可以進入議會，令社會重回正軌喎。陳家強話過往喺政府工作十年，政府內部都好想立法會重回正軌，唔好咁多拉布。

陳家強又話依家教書好開心。到底啲新學生知唔知佢做官前係教書嘅呢？佢自爆新學生直情未必知佢係邊個添，事關唔係個個學生都咁跟貼新聞，所以講開監管政策，佢仲會自我介紹做過局長添！

新東變「九人大混戰」

另外，性傾向條例家庭關注組成員趙佩玉亦都宣布參選，令新東變成「九人大混戰」，本身係基督徒嘅趙佩玉對自己能夠當選充滿信心，話「係上帝叫佢參選」，參選口號係「靠主參政 愛家護城」，提倡正確家庭價值，反對同性婚姻合法化、設立性傾向及性別認同歧視條例等，又話自己唔屬泛民又唔屬建制，而係屬於「天父」。

咁如果一旦當選，怕唔怕同同性戀嘅立法會議員陳志全（慢必）合作唔嚟？佢就話唔怕，仲話如果慢必嘅行為合乎上帝心意，佢都會支持嘅，同時亦都會向慢必傳福音，話畀佢知佢係「錯」嘅！

另外，司馬文亦報名參加建築界功能界別補選。