律政司司長鄭若驊一上任就被揭僭建醜聞，民主派當然咬住唔放，仲表明會出招根據《基本法》七十三條傳召鄭若驊到立法會交代。不過民主派早前為阻止建制派修改《議事規則》提出連串嘅「怪招」，包括一堆譴責建制派議員嘅議案，同埋多個就唔同社會事件傳召相關政策局局長嘅動議。不過，呢堆怪招最後阻唔到修改《議事規則》，依家仲堆積喺立法會議程當中，阻住佢哋傳召鄭若驊，今次真係捉蟲喇！
民主派會議召集人、資訊科技界議員莫乃光（Charles）將提出動議傳召鄭若驊下月廿八日前到立法會，但因為呢項動議同民主派怪招一樣都係議員議案，所以傳召鄭若驊嘅議案就要排喺怪招之後，連Charles都話根據目前議程最快都要月底先處理到。
為免議題過氣，民主派惟有死死氣撤回部分怪招，包括全部有關譴責建制派議員嘅議案，至於有關傳召官員嘅議案就唔係個個肯撤回，其中朱凱廸就傾向企硬唔撤。朱凱廸提出嘅怪招都有五項，如果真係要討論，分分鐘過埋下月廿八日都未輪到傳召鄭若驊嘅議案喇！