中環出更：青聯遊立會郭永亮蔡德昇互叫對方參選
唔少團體都會參觀立法會，早排就見到議員周浩鼎（Holden）變身嚮導，帶住香港青年聯會（青聯）十多名成員遊立法會，大家都好關心議會嘅運作，青聯主席郭永亮（Andy）同常務副主席蔡德昇（Stanley）仲笑住互指，叫對方參加立法會選舉添！係就要加把勁嘞！
Holden爆響口話本來係青聯創辦人之一嘅黃定光（象哥）喺立法會宴請青聯成員，但象哥臨時有事嚟唔到，咁佢之前又係青聯嘅當然副主席，所以就臨時拉伕做主人家，陪食飯之餘又陪遊立法會。之後問番象哥，佢都話唔係幾好意思，但真係有事要處理都無辦法。
周浩鼎變身嚮導
喺午宴後，Holden一盡地主之誼，帶大家入會議廳參觀，介紹吓主席台上設施，講解會議程序。副主席柯家洋（Kevin）又好奇咁問議員點揀位，會唔會建制泛民坐埋一家親？Holden就笑稱座位安排係各黨派互相協調，大家咁多年嚟都有共識。之後各人喺主席台前拍照留念，又問Holden坐喺邊，仲左睇右睇座位上嘅議員名。青聯副主席周沁去到會議廳外，又好奇吓咩人先可以用咪兜，而Andy眼見咪兜有唔同嘅咪牌，戲稱好多媒體都唔認得！
大家咁關心議會嘅運作，係咪密謀定下屆推委員做議員啊？Andy同Stanley就笑住互指，叫對方參加選舉，不過Andy就好認真咁話，青聯好似得創辦人或成員做議員，例如象哥同馬逢國，好似真係無試過有青聯主席做過議員。咦！一直盛傳象哥下屆未必會再競逐連任，而青聯前主席許華傑（Michael）又做緊象哥議員助理，唔通Michael真係會做接班人，今次青聯嚟立法會為佢出戰做好部署？
卓妮