政情：黃定光榮升外公睇B女相冧晒

立法會進出口界議員黃定光（象哥）近排紅光滿面，心情極好，原來係榮升做外公！象哥有一仔一女，細仔結婚後已有兩位小朋友，亦都係一仔一女，而佢大女就喺一月十一日生咗B女。雖然已經做咗兩位小朋友嘅爺爺，第一次做外公嘅象哥形容心情好興奮，但強調做爺爺同公公都一樣咁開心。象哥真係好公平，孫仔孫女都一樣咁錫。

象哥話外孫女出世重七磅八安士，係一個幾有分量嘅BB。咁媽媽係咪生得好辛苦？象哥就話咁又無，係順產，不過就慨嘆B女出世成個星期都未抱過，要返屋企先有得見吓。睇相B女塊面紅卜卜，眼仔睩睩好精靈，象哥淨係睇相都笑到四萬咁口。

咁會唔會親自幫B女改名啊？象哥好堅持話唔會！因為佢唔會僭越B女爺爺嘅工作，之前兩個孫仔孫女就係由佢起名，今次做外公就當然唔會諗喇！