政情：鄧賀年爆粗鬧政府泛民 辣埋自己友
早前有團體公布研究，指新界有唔少「套丁」情況，而近期社會亦對僭建問題非常關注，惹嚟原居民反彈。喺尋日嘅新界鄉議局執委會上，錦田鄉事委員會主席鄧賀年再次食咗火藥，喺會上爆粗大鬧政府同泛民。
盼社會勿只針對原居民
鄧賀年批評政府懦弱無能，成為泛民嘅應聲蟲，猶如「碌×」順應泛民去對付原居民，反問鄉議局係咪有需要號召原居民作反喇。佢又認為，近期嘅僭建、丁權等議題都係衝住原居民而來，重申原居民只係希望維持現狀，又直言所有獨立屋都有僭建問題，希望社會唔好只針對原居民。佢更認為鄉議局需要更硬淨去應對，加上鄉議局有經費，建議考慮抬棺材畀泛民議員以示不滿。
至於近期有關丁權嘅報告，鄧賀年就批評有關團體冇詢問持份者，而團體成員祖先亦只係偷渡來港，唔能夠以本土自居。不過，佢連自己友都鬧埋，點名批評鄉議局成員梁福元同侯志強接受電台訪問時「亂×咁講」，認為佢哋言論會影響整個鄉同宗族，希望鄉議局搵有Power嘅代言人喎。