政情：初選結果惹怒本土派 劉頴匡趙家賢隔空駁火
民主動力舉辦嘅立法會補選初選結果，惹起本土派人士不滿，有意參選新界東補選、聲稱獲青年新政梁頌恆支持嘅社區網絡聯盟（社網聯）發言人劉頴匡批評初選冇畀本土派參與，又指泛民主派唔願意同本土派溝通，假若喺補選時「鷸蚌相爭，漁人得利」，咁將係「泛民(界刂)本土派票」，泛民應負較大嘅責任。民主動力召集人趙家賢發聲明反駁，強調冇拒絕溝通，仲附上有劉頴匡代表社網聯簽署支持初選嘅回條為證。
劉指初選缺乏代表性
劉頴匡尋日喺記者會上話曾喺舊年十二月底主動同趙家賢聯絡，要求對方協助促成本土派同民主派會面就選舉策略上作溝通，惟趙家賢口頭上承諾後一直冇行動，令佢感到失望。對於初選僅一萬三千名選民投票，佢認為初選欠缺代表性，係一個「篩選」，而勝出初選嘅新民主同盟范國威嘅立場同本土派南轅北轍，難以代表本土派發聲。
趙反駁對方曾表支持
趙家賢其後發聲明反駁，指社網聯曾回覆表示支持初選，亦有出席舊年十二月五日及十日嘅初選機制發布會同論壇，劉頴匡更曾代表社網聯簽名，但到咗舊年十二月底，劉又以個人名義同佢聯絡，認為其中一名初選候選人張秀賢未能代表本土派，欲自行參選。趙家賢補充，民主動力願意同社網聯保持友好關係，以及透過尊重同溝通，做好協調工作。