政情：傳姚松炎會被DQ馮檢基等執死雞
立法會港島、九龍西、新界東同建築界功能界別四席補選，仲有大概兩個月就舉行。舊年被取消立法會議員資格（DQ）嘅建築界前議員姚松炎，喺民主派就補選舉行嘅初選中勝出，將代表民主派出戰九龍西補選。但有消息話，姚松炎舊年已被DQ，極大機會唔能夠參加補選，若姚松炎一旦補選都被DQ，一路吼住重返立法會嘅民協馮檢基就會頂上，到時佢就可以「復活」，延續「永續參選」嘅神話喇！
民主派日前公布補選初選嘅結果，姚松炎喺初選中勝出，輸咗嘅馮檢基排名就僅次於姚松炎。不過有消息話，因為姚松炎已被DQ，並唔能夠再喺今屆立法會擔任議員，所以嚟緊嘅補選如果佢參加，同樣都係會被DQ。
姚松炎尋日出席電台節目時鬧爆政府帶頭搗亂香港，又話從邏輯上嚟睇，政府可以DQ佢參選建築界嘅資格，但佢冇參加過九龍西直選，所以仲係可以參選。佢又話初選結果證明咗佢係有民意授權基礎，警告政府「夠膽就用那渣招」，政治後果政府要自己承擔喎。
對於被DQ人士係咪唔能夠再參加補選，特首林鄭月娥就話，香港所有公開選舉都係公平公正、依法執行，每個人能否參選係由選舉主任根據立法會同選舉管理委員會嘅相關條例決定，並非由特首「說了算」。而有政府中人亦向我哋透露，政府再DQ姚松炎對政府都冇着數，一來因為就算換上另一民主派人士參選，都唔代表建制派可以贏到，二來仲會激起民憤，同政府想吹和風係大相徑庭。
如果姚松炎真係被DQ，最大得益者可能就係馮檢基喇！因為民主動力有協議，一旦姚松炎被DQ，喺初選中排第二嘅就會頂上，馮檢基都承認有呢個安排。不過，如果真係馮檢基呢個大後備頂上，民主派都咪話唔頭痕，皆因屢戰屢敗嘅馮檢基早已惹來民主派年輕支持者同本土派不滿，所以佢出選嘅話都好難取得佢哋嘅支持，民主派保唔保得住九龍西一席都好難講。
陳家珮陳玉娥已正式報名參選
另外，立法會補選提名期尋日開始，選舉事務處首日共接獲兩份提名表格，包括新民黨南區區議員陳家珮報名出戰港島區補選，仲有人稱「娥姐」嘅獨立無黨派人士陳玉娥繼一六年立法會選舉後再接再厲，報名參與新界東補選。而有意出戰新界東補選嘅立法會前議員鄧家彪尋日亦去咗新界鄉議局拜票，鄉議局主席劉業強話佢了解偏遠鄉村問題，認為佢參選可以令建制派團結咁話。