中環出更：未來科技洪光汜預告空氣充電
科技進步令市民生活產生巨大變化，做傳統工業嘅商家都要追上時代腳步，引領潮流創新。早前喺仁愛堂周年慈善餐舞會上，見到「熨斗大王」、仁愛堂副主席陳鑑光（Charles）同生產充電器嘅總理洪光汜，兩人大談創新經驗。洪光汜話約五年前已研發出無線充電器，但喺舊年先至隨住智能手機使用而流行起嚟，佢笑笑口預告將來只需收集空氣中嘅電波能就可以充電喎。
被商界老友暱稱為「大熊」嘅洪光汜笑言，以前俗稱「火牛」嘅充電器好大舊，依家唔止體積細咗，充電速度亦都快啲，以前充飽電郁親要十個鐘，依家就一個鐘就搞掂，仲發展到無線充電添！講起無線充電，佢都算係始祖，早喺一三年就研發出供電動工具使用嘅無線充電器，直至舊年智能手機推出無線充電器，市場先至流行起嚟。
洪光汜話無線充電只係一個過渡性產品，依家業界研究緊收集空氣中嘅電波能，未來可能只需將手機放喺衫袋度就可以充電。聽落都幾不可思議。
「魅影之夜」善長齊聚籌款
Charles就話十幾年前佢推出掛燙式熨斗時，朋友都話唔得，因為燙衫唔起骨點得o架？但後來就大受歡迎，事關現代人時間最緊要，尤其係年輕人，件衫見到人嘅地方燙到就得，見唔到人嘅地方就算啦！
講番晚宴係為仁愛堂的社區藥房籌款，主席李愛平、籌委會主席羅台秦、前主席張心瑜同冠名贊助嘅東華三院前主席陳文綺慧夫婦都有到場。當晚主題係魅影之夜，好多嘉賓戴上華麗眼罩，羅台秦話目的唔係扮神秘，而係想彰顯善長們「為善不欲人知」嘅善行。
卓妮