孟子曰︰「人不可以無恥，無恥之恥，無恥矣。」新任律政司司長鄭若驊被爆大宅有僭建物，反對派政客好似執到寶咁，死咬住唔放，點知睇真啲，原來佢哋自己都係身有屎，特別係人稱「盲毛」嘅本土派議員毛孟靜，屋企車房改建住宅，拖足八年死都唔肯改，居然仲好意思出嚟指手畫腳，扮晒正義朋友，呢啲咪「無恥之恥」囉！
大家有眼見，同樣被指僭建，鄭若驊出事後連番耍冧之餘，亦第一時間聘請工人善後；邊似得「盲毛」咁氣定神閒，被揭臭史都仲可以玩語言偽術，硬拗自己並冇僭建，又強調一直有交差餉，購入單位時已經係密封而唔係車房云云。乜都佢講晒。
咁就好笑嘞，鄭若驊當初何嘗唔係以「購入時已經係現有模樣」做擋箭牌，點解「盲毛」之流嘅反對派仍然不依不饒？即使退一步講，改變原本泊車位用途都需要向有關部門申請並獲批准，「盲毛」有冇咁做，好應該同公眾清楚交代。
當然啦，反對派政棍從來都係嚴人寬己，雙重標準，有口話人冇口話自己，毛孟靜死雞撐飯蓋一啲都唔出奇，奇就奇在執法部門相當「配合」，一直錫住錫住，好似驚死郁親人哋條「毛」咁。呢，屋宇署八年前係咁意出過封信畀毛孟靜，叫佢恢復原狀，之後就關人個關，最近群情洶湧，點知當局仍然唔當一回事，指有關改建未對樓宇結構及消防安全構成明顯危險，唔屬於需要取締類別，唔會採取進一步行動咁話。喂，唔該當局玩包庇縱容都唔好玩到咁出面，當市民傻嘅咩！
話時話，如果毛孟靜呢鑊嘢咁都過到骨，唐唐肯定心口都揼到爛，如果當初堅持「地下王宮」「冇結構危險」，咁就唔使搞到連特首都冇得做、老婆被告上法庭兼罰款喇！
講到呢度，可能大家會問，反對派政客唔少都係僭建常客，部分更加係仍然活躍於台前嘅「大佬輩」，點解個個都要拆僭建以平民憤，唯獨毛孟靜可以有特權？「盲毛」係咪好似「佔中三丑」之一嘅戴妖咁，有做政府高層嘅大學同窗射住射住，外人不得而知，但當局對毛婆法外開恩，呵護備至卻係不爭嘅事實。毛孟靜捲入漢奸黎黑金醜聞，連金主都直認不諱，最後竟然不了了之；又好似佔中期間，毛孟靜被指購買發電機、帳篷等示威工具所用嘅八千元，最終竟然由公帑埋單，攞政府錢反政府，真係唔到你唔服。
咁就唔怪得港府成日畀人話老虎屁股不敢摸，走狗尾巴不敢碰，連小小一條「盲毛」都奈何不得，仲話乜嘢法治社會，簡直笑大人個口！