政情：任亮憲派月曆 惡搞鄧家彪
有「維園阿哥」之稱嘅任亮憲，早前突然宣布有意參加三月份舉行嘅立法會香港島補選，雖然相對其他參選人低調，但佢已派發月曆作宣傳。驟眼睇佢嘅宣傳品，仲以為係屬於其他人，咁宣傳法仲有冇用呢？
兩者設計同造型相似
有讀者將任亮憲同立法會前議員鄧家彪嘅月曆作出比較，發覺不論係顏色、設計等都非常相似，而且同樣印上二維條碼同Facebook專頁名稱，連擺位都一樣，真係幾可亂真。而鄧家彪就喺月曆上印有履歷，好似寫明曾任立法會議員，但任亮憲就玩嘢，將立法會議員粗體作強調，但又表明「唔知選唔選到」喇！
另外，佢哋嘅照片神態同打扮都好似，同樣着住西裝褸，又帶住眼鏡望右方。不過，任亮憲貫徹玩嘢風格，將鄧家彪所屬工聯會惡搞改成「紅衫仔」。
任亮憲連港島區潛在對手、南區區議員陳家珮都唔放過，事關陳早前月曆印錯十二月三十二日，任就唔放過抽水機會，同樣印有十二月三十二日，仲用紅圈圈起，真係盞鬼喇！