政情：黃浩銘打定輸數 徵求日曆坐監用
社民連副主席黃浩銘尋日喺Facebook貼文自稱有個唐突嘅要求，係乜？原來係向各立法會議員同區議員徵求A4 size嘅2018年日曆，仲話要帶入監獄用。原來聽日就係法庭就佔旺藐視法庭判刑，睇嚟黃浩銘都已經打定輸數，仲喺留言講明「星期三坐監」，所以就趁早準備定再次入獄要用嘅物資咁話喎。
Fb留言叫定網友寄信畀佢
黃浩銘個post都有唔少網友回應，南區區議員區諾軒都話可以提供日曆，但就未安排到。亦有網友表明有日曆在手，會喺上庭前攞畀佢。
其他人亦都好關心黃浩銘有冇其他需要，包括要唔要書同字典等，而黃浩銘就回覆話呢啲已經安排好嘞，仲留言叫啲網友寫信寄去監獄畀佢添！
其實，除咗聽日佔旺藐視法庭嘅判刑外，黃浩銘仲有一單反東北發展案等候上訴，但要等今日「雙學三子」香港眾志秘書長黃之鋒、主席羅冠聰同埋學聯前秘書長周永康，衝擊政府總部東翼前地終審上訴有結果後先再處理，所以無論佢星期三嘅判刑結果係點，可能都要預備定啲物資，做好兩手準備嘞！