政情：劉小麗炒人唔畀代通知金 度縮隨時犯法

立法會行政管理委員會去年十一月開會後，決定原則上會向「DQ四」追薪，包括四人由前年十月中以來收取嘅議員酬金、預支營運資金及開支償還款額，各人總數由二百七十四萬至三百一十三萬元不等。行管會尋日再次開會討論有關問題，但由於未收齊所有回覆，暫時未決定到係咪三筆錢都會追到足，要留待下次會議處理。

好似預知被DQ 訂免賠條款

劉小麗前年上任後，向秘書處預支咗四十萬元營運資金，零零舍舍比另外兩名DQ議員建築界姚松炎同香港眾志羅冠聰少咗六萬元。據聞秘書處深入調查後，發現原來小麗同部分議助協議好，不論雙方今後因任何理由解約，佢都毋須向對方支付一分一毫代通知金。我哋寫過小麗係一位「神婆」，精通玄學占卜，唔通佢早已預知自己議員份工做唔長，所以諗定縮數同議助訂立呢項免賠條款？

行管會委員研究轉介勞工處

不過，根據《僱傭條例》，任何按連續性合約受僱（即連續受僱於同一僱主四個星期或以上，而每星期最少工作十八小時）嘅僱員，僱主都必須給予最少七日嘅解約通知期；如僱主因不同理由要對方即時執包袱走人，就等同單方面未能履行合約，必須向僱員支付相應嘅代通知金，即最少七日人工；如僱傭合約並無訂明通知期長短，法例規定即係要一個月通知期，唔可以私下協議零通知期或唔畀代通知金，否則即屬違法。

有行管會委員質疑小麗咁做係違法，會研究跟進甚至轉介勞工處處理。但亦有意見認為，小麗今次究竟有冇犯法，要睇清楚份合約點寫先知，呼籲相關被炒僱員挺身而出，向勞工處提供資料。我哋尋日曾嘗試聯絡小麗回應事件，但至截稿前都未有回覆。