中環出更：波牛陳沛然撈多瓣做歌手
眾所周知，立法會醫學界議員陳沛然（Pierre）係波牛，自稱正職係足球員，但最近佢撈多瓣唱埋歌，做咗足球員歌手添！
Pierre尋日喺Facebook上分享忙碌嘅一天行程。佢透露，朝早要到立法會開會，中午則趕返去醫院參加午間音樂會，而晚上就變身做足球員，去天水圍踢醫管局盃賽，聽落都覺得行程相當緊密。
同醫生同事夾Band表演
唱歌都掂？原來佢喺醫院午間音樂會開金口唱《年少無知》，仲叫大家留意歌詞，唔知佢想表達啲咩嘞，但可以同一班醫生同事合作，相信先係夾Band嘅樂趣所在。佢透露，樂隊叫RuttonJ，成員分別有腦神經科、紓緩醫學科、內科等醫生，除咗有主唱，仲有成員負責彈琴同結他，睇嚟都有番咁上下音樂造詣。而樂隊喺過去一年都已試過三至四次醫院活動表演，絕非新手，相信唔使特登為尋日嘅演出進行特訓喇！
佢仲透露，尋日全日都非常粉紅，朝早開會時打上粉紅色領呔，獻唱時就換上粉紅色恤衫，而晚上踢波就會着上粉紅色球衣，佢更講明係特登襯過，所以先全日以粉紅色示人，估唔到佢都會咁貪靚喎。
卓妮