中環出更：三歲畀狗咬 曾國雄留童年陰影
童年陰影呢樣嘢好難解釋，有啲人嘅至愛，偏偏係某啲人嘅最怕。卓妮早前喺馬場見到香港鐘表業總會前主席曾國雄（Jerry）同梁青華，Jerry自爆好怕狗，事關佢細個畀大唐狗咬過，至今都好驚狗。偏偏佢嘅死黨梁青華好鍾意狗，尤其係高大威猛嘅退休警犬。唔怪得之住喺大埔村屋嘅梁青華成日招呼朋友燒嘢食，Jerry從來都唔去喇！
Jerry笑笑口話當年被咬時只得三歲，而且佢返屋企必經唐狗看門嘅地方，成日驚到唔敢返屋企。有次佢燒炮仗嚇走隻狗，再放低塊肉畀佢食，先至返到屋企喎。聽落真係幾慘嘅。
香港珠寶製造廠商會中國內地事務小組成員朱容基（Benson）就諗起細個好百厭，有次去上海鄉郊玩，當時佢只得幾歲大，玩滾鐵環時唔經唔覺行到一個養豬場，結果一個唔小心就跌咗落飼料糟，啲飼料係白色膠漿嘅物體，細細粒嘅佢成個人跣低咗，被淹沒晒。
朱容基細個跌落飼料槽險死
好彩有個老伯伯記起有個小豆丁行過，點解唔見咗人，於是周圍搵，見到飼料槽冒出微弱嘅氣泡，先至救番佢一命。
雖然有咁得人驚嘅經歷，但Benson笑稱冇留下童年陰影，反而因為大難不死，令佢堅信必有後福喎。
鐘錶獲認證 黎衍橋心情雀躍
香港表廠商會永遠名譽會長黎衍橋都有入場撐愛駒。雖然愛駒冇勝出，但係佢依然好開心，皆因佢自創品牌嘅手錶最近獲得德國天文台嘅認證，佢話係業界極高榮譽，象徵國產嘅機芯工藝獲得肯定。獲此認證之後，隻錶身價即升百倍，難怪佢咁雀躍喇！
卓妮