「如果你懷疑有兒童受到虐待，就應該立即舉報。咁做唔係干預人哋嘅家事，而係挽救嗰啲被虐待嘅細路仔。」呢段一九八九年嘅政府宣傳片，大家對背景嗰位抱住洋娃娃、一臉無助嘅小女孩可能有啲印象。可惜吖，眨吓眼三十年就快過去，今時今日虐兒慘劇仲係無日無之，你話幾咁悲哀。
睇吓數字就知幾得人驚。去年首十個月警方共處理七百幾宗虐兒案件，平均每月有七十幾宗，其中近一半涉及侵害兒童行為。大家不禁要問，如果專業人士能夠及早介入，慘劇係咪有機會避免？最近就有人重提「強制舉報」嘅建議，規定學校等相關人士如懷疑有兒童被虐待，必須通報政府部門，否則要負上法律責任。
對於有關建議，學校同社工界反應尚算正面，勞福局亦聲稱「持開放態度」，照計應該事在必行。但原來唔講唔知，聯合國兒童權利委員會早喺一三年已經建議香港設立類似呈報機制，奈何港府諸多藉口，推三阻四，否則嘅話，五歲女童臨臨或者唔使枉死。唔好畀人批中，依家風頭火勢，群情洶湧，港產官僚梗係乜都話有得傾，等件事丟淡啲，又係當冇事發生過嘅咋。
可能有人會擔心，強制舉報懷疑個案會唔會造成「濫報」？之前有大學研究發現，只有百分之一虐兒個案獲呈報並接受專業援助，所謂「濫報」不知從何說起。再講吖，啲學校為保校譽，臭屎密冚就聽得多，甚至有學校試過學生跳樓都唔報警，與其驚校方「濫報」，不如驚佢哋「瞞報」，而強制舉報制度正正係一個平衡。
當然喇，學校同社工及早發現並上報係一個問題，當局有冇足夠資源跟進又係另一個問題。港府口口聲聲話會加強對學校社工支援，又話會積極探討如何提升校長及教師對懷疑虐兒個案嘅警覺性，大家最好都係聽住先。第樣唔使講，淨係暫託幼兒服務，當局口爽荷包立，早就備受詬病，唔少在職家長為照顧仔女放棄工作，有人甚至同另一半分居，以加快輪候社區幼兒照顧服務，更多雙職家長焗住獨留兒童在家，不知幾多意外由此而生，你話官僚係咪靠害吖。
最離譜嘅係，政府宣傳片叫人「立即舉報」懷疑虐兒個案，現實卻係市民報警求助，警方唔係上門勸幾句收隊，就係將個波掟去社署，社署再將個波掟畀學校，拖個一年半載冇人過問可謂閒過立秋，咁搞法，有乜法子唔出事。
人生冇幾多個三十年，當年抱住洋娃娃嘅小女孩今日已為人母。救救孩子全社會有責，千祈唔好讓悲劇一代一代重演！