中環出更：晒鑽石色士風 盧偉國唔驚人偷
色士風素來都係立法會工程界議員盧偉國嘅至愛，佢早前都講過自己屋企其實都收藏咗三十至到四十支，不過身為色士風愛好者嘅佢又點會滿足，佢尋日喺自己嘅Facebook上載咗張相，見佢攞住支鑽石色士風（Diamond Saxophone），閃到爆！
盧偉國話呢支新色士風喺美國一間專門設計色士風嘅公司訂番嚟，舊年十二月先到手，隨即就喺一個業界嘅聚會上登場，仲話個個都對佢呢支新寵讚不絕口呀！
用水晶造 音色好靚
咁高調怕唔怕畀人偷呀？盧偉國笑住話雖然支色士風個名叫鑽石，實際上只係用水晶造，而且相信大家都會睇得出唔會真係用鑽石造嘅，所以支色士風並唔貴，大部分都係手工錢，所以都唔擔心畀人偷，連特別嘅收藏方法都唔使。佢仲話雖然只係水晶，但支色士風嘅音色都好靚，加上造型特別，唔怪得佢都忍唔住要貼上Fb，實行「放閃」啦！
卓妮