中環出更：徐飛想成立家長義工隊 支援問題家庭

徐飛話好多小朋友嘅家庭問題，通常係部分家長本身有問題，希望成立家長義工隊，支援家長嘅問題，佢又提起自己出身基層，覺得基層小朋友同中產嘅機會係好唔平等，跨代貧窮唔應該影響小朋友嘅起跑線，所以希望成立基金會，搞畫展、馬拉松等活動，培育多啲小朋友，盡力拉近不同背景小朋友嘅距離。

單親家庭面對嘅壓力好大，同樣亦好需要支援。余秀珠話政府曾開設多間單親中心，後來就將呢啲單親中心全部關閉，稱開設綜合家庭服務中心可以做晒，點知呢類中心乜嘢都做，根本未能針對單親家庭嘅需要。佢認為單親人士需要託兒服務同培訓等，才能無後顧之憂咁返工，咁就較易融入社會，如果唔早啲幫有問題嘅家庭，小朋友好易誤入歧途。

田北辰變「小粉絲」同運動員合照

當晚亦有運動員出席活動，唔少政商界人士都忍唔住走埋去合照，包括立法會議員田北辰都乘機同「女飛魚」歐鎧淳及「三鐵公主」許煒森影番張相，唔通係見到佢哋唔係平時嘅運動Look，而係着咗晚裝出席，覺得特別眼前一亮？田北辰就話，唔係見到靚女先衝埋去，自己係「小粉絲」喎！原來許煒森係基金會嘅助理秘書長，冇做運動員後，都試過唔同嘅工作，又做一個體育基金嘅義工，依家做助理秘書長同樣係想幫一啲基層小朋友。聽落真係有愛心嘞！

余秀珠話單親家庭需要更多嘅關心同照顧。（葉華英攝）

田北辰（中）變身小粉絲，衝前同歐鎧淳（右）及許煒森（左）合照。（互聯網圖片）

卓妮