未入正題之前，功夫茶想講一單發生喺印尼嘅新聞。話說之前雅加達發生一宗自殺式炸彈襲擊，造成八死多人受傷，點知調查後有驚人發現，原來主謀當時正在服刑，守衞森嚴嘅監獄居然淪為恐襲指揮中心，都咪話唔誇張！
咪以為淨係第三世界國家至有咁嘅事，隔籬梳打埠一樣唔好得幾多。話說澳門司警日前喺外港碼頭拘捕一名男子並搜出毒品，對方供稱受兩名正被羈押嘅男子指使，從香港運毒去澳門，司警同懲教管理局其後喺路環監獄發現四部手提電話、電話卡以及充電工具等，懷疑用嚟指揮獄外同黨。喂，成個監獄十足十無掩雞籠咁，今次就話監倉藏手機啫，下次容乜易藏埋軍火炸彈，再下次容乜易直接運毒品入監倉派o架！
即係咁，澳門治安一向麻麻，過往亦時不時有不法之徒受僱販毒集團，從香港帶貨過澳門，但由在囚人士「運籌帷幄」進行遙控，又的確係匪夷所思。正如本港資深懲教人員所講，本港懲教院所管制極之嚴格，除非係高級懲教人員又或者有行動需要嘅指定人員，否則大部分懲教人員本身都唔畀帶手提電話，更遑論囚犯入住嘅監倉。澳產官僚質素低下，管治百孔千瘡，點止衰過清朝咁簡單，直頭差過第三世界國家！
話時話，澳門監獄保安出名鬆懈，早排有囚犯喺監倉上吊自殺，就係最佳例子。可惜吖，無論賴幾多鑊都好，澳產官僚硬係唔會經一事長一智。好似今次事件咁，當局第一時間居然唔係積極揪出包庇嘅貪污人員以及打貪，而係採用消極嘅攔截信號手法，包括購買手提電話信號堵截系統，本末倒置，捨本逐末，簡直不負責任。再講吖，無論硬件點樣先進都好，官老爺胡混度日，懶得就懶，軟件跟唔上都係嘥氣，同掟錢落鹹水海冇乜分別！
仲有吖，澳門有名你叫「特拖政府」，官老爺話就話要改善器材啫，實際上拖到何年何月，真係冇人話得埋。唔使講第樣，澳門監獄人滿為患，當局話要起新監獄講咗N年，但至今仍然只聞樓梯響，連高官都認，再咁落去，新收嘅犯要瞓地下至掂，簡直吹脹。
好多人都話香港基建無一不延誤，無一不超支，查實澳門喺呢方面只有過之而無不及，大至輕軌工程固然淪為超支無底洞，簡單到起間離島醫院亦係搞到進度大落後兼屢爆醜聞；至於海關無理扣查外國醫生團隊、兩次倒掛五星旗等亂象，更加係三日三夜都數唔完。
港澳兩個特區回歸後各有各衰，一個表裏如一，內外俱爛，一個金玉其外，敗絮其中，搞到北大人都面目無光，諗落都幾可悲！