最近港鐵大賣廣告吹噓威水史，遠至瑞典嘅鐵路系統都係由港鐵營運，確係值得驕傲。可惜十功抵唔上一過，尋日港鐵東鐵線全線跪低兩粒鐘，場面亂過亂世佳人，乘客慘過走難，呢勻認真失威咯。
係咁嘅，尋日朝早九點幾，負責控制東鐵線信號系統嘅伺服器出現問題，轉換後備系統後仍然唔掂，搞到要人手操作，以為重新啟動伺服器就可以回復正常喇，點知都係唔成功，港鐵為安全起見決定暫停東鐵線運作，直到十一點幾先至恢復正常服務，乘客大失預算，唔鬧爆港鐵至奇。
梗係喇，東鐵跪低咁耐已經夠衰，應急安排仲要一團糟，接駁巴士服務唔湯唔水，乘客唔係被困車廂，就係要同其他人鬥逼鬥搶；淨係等接駁巴士都要粒幾兩粒鐘，加上月台職員指揮唔清晰，搞到月台逼爆，打工仔學生哥遲大到唔在講，跨境學童及旅客先至最閉翳，塞住喺羅湖口岸唔上唔落，都唔知點算。有乘客形容當時恍如置身屍殺列車，場面有幾混亂可想而知，部分乘客忍唔住自己開門走落路軌，雖然危險，其實都係焗住嘅咋。
事後港鐵管理層係就係有向公眾道歉，仲話會徹查事件添，但時間就係金錢，乘客慘被玩殘，社會經濟損失巨大，講幾多次對唔住都補唔番喇。正如立法會議員話齋，港鐵信號系統老化問題嚴重，淨係過去一個月已有八宗超過八分鐘嘅延誤事故，最離譜係善後安排倒瀉籮蟹，完全不能接受。咁又係呀，呢幾年港鐵大小事故不斷，照計應該「訓練有素」，點知次次安排混亂如故，點都講唔通喇。
好明顯嘞，港鐵年紀大，機器壞，大鑊咪爆完又爆囉。港鐵都知衰嘞，早就計劃好今明兩年完成信號系統更新，點知避得過初一，避唔過十五，始終都係賴晒嘢。有人估計今次事故可能同港鐵測試新信號系統有關，到底係點仲要查過至知，但原有系統不勝負荷，必須加快更新步伐就路人皆見，尤其係今次連後備系統都冧埋，萬一下次又係咁，隨時唔止癱瘓兩粒鐘o架。
當然喇，港府作為港鐵最大股東，監管不力始終難辭其咎。港府話就話設立罰款機制，最甘一次仲罰咗港鐵七百幾萬添，但對比港鐵年年勁賺過百億元，根本係九牛一毛咋，何況喺「只加不減」機制之下，成本最終又係轉嫁乘客，即係嘥氣。
所以話啫，港鐵作為龍頭交通工具，牽一髮而動全身，真係冧不得o架。今次事件固然必須徹查及懲處，但督促港鐵加快更新信號系統更有迫切性，港產官僚咪懶懶閒吖！