政情：鄧家彪有新搞作 大圍搞互動遊戲

阿Bill話呢個遊戲需要利用智能電話掃描二維條碼，所以特別關心私隱問題，得知唔存在相關隱憂先去做，真係非常小心！佢又透露，因為廣告公司方面想實驗新技術，而佢又搵緊渠道可以軟性地推廣，所以就促成今次呢個互動遊戲。

希望展示親民一面

呢個互動賽跑遊戲最多可以四個人參加，參加者利用智能電話連線後，依據搖動手機嘅頻率去決定速度，勝出者可以獲毛巾作禮物。阿Bill就話禮物價值唔高，但就希望展示到親民、唔老土嘅一面，亦可以作為平台播放工作短片。

至於擺放地點都有考慮過，因為大圍平日多街坊，而周末就多沙田居民去搵食，可以接觸不同群組。咁呢個新概念要花幾多錢呢？阿Bill就話唔清楚，強調最重要都係好玩同輕鬆啫！