政情：馬浩文：培養敬老觀念由教育入手

港人掛住搵錢忽略長者

馬浩文係專以小朋友同老人家為服務對象，嗰次佢入新界為一位獨居兼患癌嘅長者慶祝生日。嗰位長者雖然時日無多，但就同佢講，話自己個女好少探佢，皆因要為口奔馳，要體諒吓啲後生咁話。對方嘅說話令佢覺得好多港人為咗搵錢，往往會忽略咗屋企人。

佢話，其實對老人家嚟講，更多嘅財富亦無法取代仔女嘅關懷，但係港人偏偏就係搵銀大過天，好多老人家就係因呢種價值觀而被仔女冷落咗。鑑於人口老化日趨嚴重，佢認為年輕一代應該要多啲陪伴老人家，而培養敬老觀念，最好就係由教育入手。