政情：馮檢基袁海文 爭搵明星谷人氣
立法會四區補選將喺三月舉行，民主派為協調人選而籌備初選將喺本周日舉行投票日，各候選人趁住最後一星期趕緊拉票。同樣參與九龍西選區嘅民協立法會前議員馮檢基（阿基）、民主黨（白鴿黨）區議員袁海文尋日就分別喺Facebook上發布短片同合照，當中阿基就自稱同歌手李克勤有共通點、而袁海文就話有「美魔女」之稱嘅藝人羅霖支持佢。睇嚟係搶住明星做噱頭谷知名度喎。
一個扯上李克勤 一個搵羅霖
阿基早前喺初選論壇上，被袁海文揶揄其負面知名度較高、連喺頒獎禮上獲獎嘅歌手李克勤亦被封為「樂壇馮檢基」。阿基喺尋日發布嘅短片中亦話有人話佢係政壇李克勤，事關佢同李克勤有共通點，指李克勤熱愛唱歌同送禮物畀外國球隊，而阿基則熱愛香港、喺政壇上打拚係一模一樣。阿基又話民協未必係前鋒，而現時社會需要一個有經驗嘅中場，又自稱係「既能進攻、又能防守的中場」，仲話今次係自己最後一次參與立法會選舉添！
咁啱得咁蹺，袁海文又有明星撐喎。近排專攻醫學美容議題嘅袁海文喺Fb上載咗一張同羅霖嘅合照，羅霖仲撰文指袁係專門處理美容糾紛嘅專家，以及推動規管美容業、監察業界以保障消費者同美容院。羅霖喺文中亦話希望袁可代表消費者權益參與補選，畀佢喺一個更大嘅平台上發揮，以打擊不法之徒。