政情：修改議規 嚇窒泛民唔敢闖關驚捉蟲

怕流會再續會 變相為建制助攻

話說前日嘅會議有約十次點算法定人數，大部分都係由人民力量嘅陳志全提出，間中有毛孟靜同朱凱廸幫拖，其中一次要去到十四分三十多秒先夠人，差少少就會流會。有泛民中人話，依家比建制派更加驚會流會，差一個人就流會嗰刻真係諗緊好唔好入去，入與唔入都係兩難。

點解？泛民中人就解釋，始終係修改《議事規則》後首次，點樣流、乜嘢情況流、乜嘢人令到個會流，都係要諗過度過，唔係按新《議事規則》，主席可以宣布流會後又再續會，咁就變相為建制助攻，顯示修改嘅好處。所以佢話呢個咁重要嘅時刻，點樣去做要整個泛民去討論。

財會將討論打擊拉布 泛民無符

被喻為另一戰場嘅財務委員會，將會討論修訂委員會同其轄下人事編制小組、工務小組嘅會議程序，進一步打擊拉布。另有泛民中人話呢個戰場無得打，只要過半數人支持就改到，建制派唔會唔夠人改，只好冀望吓會唔會有甩轆。佢又話最絕都係如果項目喺工務或人事編制小組獲得通過，喺財會再討論就要得小組議員同意，咁咪即係綑綁要人投票唔畀講？

泛民未來方向會係點？暫時都無泛民政黨可以答得到，但有人就話經過修改《議事規則》、六人被褫奪立法會議員資格後，泛民各板塊之間多咗體諒。前路未明，泛民個個都變成驚弓之鳥，正所謂「敵不動，我不動」，邊個郁親都係牽一髮而動全身，都係企埋一邊等「出頭鳥」安全啲，廢事捉蟲變罪人嘞！