中環出更：答問會百態瞓覺睇片玩電話
立法會尋日召開答問大會，唔知係咪冇乜新意兼太沉悶，嚟撐場嘅個別行政會議成員就疑似大覺瞓，有部分在席嘅立法會議員就做其他嘢，包括睇片、玩電話喇，真係見盡議會百態。
答問大會喺尋日朝早十點半開始，起初大部分議員都坐定定，之後按捺不住開始攞電腦、電話出嚟撳。其中體育、演藝、文化及出版界馬逢國似乎聽到好悶，係咁上網左睇右睇，中間都似怕畀人見到，放低過吓電話嘅。殊不知，去到答問會尾聲，馬逢國都忍唔住攞電話睇片，睇完一套又一套，仲專登攞另一部電話墊底托住嚟睇添！
張宇人兩部手機係咁撳
話說喺保險界議員陳健波提問時話香港人開心指數低，係咪要做多啲工作推動工作生活平衡，仲建議設立唔同假期，好似「充電假」、進修假等。特首林鄭月娥喺回應時就笑話飲食界議員張宇人聽到皺眉頭，仲笑唔知張宇人係咪聽到瞌眼瞓！其實身兼行會成員嘅張宇人已經好落力唔瞓，但就不時攞起兩部電話撳，仲疑似喺度玩接龍。
葉國謙李國章疑似瞓着
再睇上層公眾席多位副局長同政助都有出席答問會，坐定定聽會，但好多人都頭耷耷望電話。唔知係咪睡魔急Call，行會成員葉國謙同李國章就聽到疑似瞓着覺，合埋眼咁聽會，當去到議員熱烈討論律政司司長鄭若驊僭建事件時，佢哋即刻好醒神，坐直個人聽清楚講緊乜，而教育局副局長蔡若蓮就不停咁按眼，商務及經濟發展局副局長陳百里就合埋眼，睇嚟好攰咁喎。
卓妮