林鄭月娥經常強調以「新思維」解決香港長期積累下來的問題，民生是今屆政府特別強調要多作改善的，可惜雷聲大雨點小，尤其在房屋及扶貧方面，實在看不出有甚麼新思維，基層面對「醫食住行」依然感到樣樣難，新一年打工仔面對加價壓力必定大感吃不消，「無殼」中產面對加租也必更叫苦連天。
香港財政相對穩健，政府錄得多年盈餘，上個財政年度有成千億元盈餘，今個財年股旺樓旺，財政司司長陳茂波在其網誌亦不禁透露「盈餘會相當高」，應該又破千億元。香港政府相信是世上最富有的政府之一，財政儲備逾一萬億港元，連同其他可動用資產，足夠政府三年半的開支，仲有成三千多億美元外匯儲備，政府可以講真係肥到着唔到襪。之但係官富民貧，政府扶貧顯然唔到位，否則怎會愈扶愈貧，一六年貧窮人口高達一百三十五萬，即每五個人就有一人貧窮。政務司司長張建宗就話喇：本港人口高齡化不可逆轉，每年有數萬人踏入六十五歲，貧窮長者數量遞增，抵銷扶貧政策成效，故未來貧窮情況改善空間有限。
治政之要在於安民，安民之道在於察其疾苦。政府庫房水浸，可是政策上不見真能體察民情，高官思維堅離地，哪裏會明白基層日常生活的苦況。是以運房局局長陳帆認為年輕人買唔到樓，又想自己有個空間，就去買車，於是路上就多了車！環境局局長黃錦星又炫耀自己至叻慳電，電費不貴。唉，香港夏天炎熱，尤其住喺劏房嘅基層，唔開冷氣根本瞓唔到覺，新一年電費加價，前財爺又cut咗電費補貼，對於基層來說，夏天電費真係一項大負擔，老朽極希望陳茂波喺嚟緊嘅預算案會有電費補貼呢項善政。
陳茂波千祈咪學前財爺嘅守財奴心態，應還富於民，大刀闊斧改善民生是港人對政府理財新思維的期盼！