中環出更：新教育撥款未批齊 葉建源追數
特首林鄭月娥喺舊年上任之後，隨即就向立法會提出要增加五十億港元教育撥款作為經常開支，先批咗三十六億元，但時至今日已過咗大半年，仲有嗰十四億元呢？立法會教育界議員葉建源就追數，話呢十四億元一定要喺嚟緊二月底嘅財政預算案中反映出嚟，例如開設更多常額教師以提高教師編制比例，或者讓「特殊教育需要統籌主任」獨立成為高級學位教師等。
冀重啟學校改善工程計劃
葉建源尋日聯同其他教育團體一齊見財政司司長陳茂波（波叔），仲提交咗一份《2018年財政預算案教育財政暨教育政策前瞻》，除咗上述嘅建議外，仲希望政府可以提高教育開支，應用喺更多唔同嘅項目，包括希望政府能撥款一百億元重啟「學校改善工程計劃」、開展落實幼稚園薪級表等，而葉建源提及需增加小學輔導人員，為全港公營小學提供社工及輔導老師至少各一名，以降低再發生近日屯門五歲女童疑遭虐待致死嘅悲劇。
波叔日前自爆庫房水浸，葉建源亦話政府之前公布嘅財務狀況大豐收，唔怪之得佢追政府追得咁緊，仲要政府再撥多啲錢去做教育項目啦！
卓妮