開講有話，新官上任三把火，估唔到律政司司長鄭若驊上任櫈都未坐暖，就被揭發問題多多，自己撲火都撲到手軟，真係唔到你唔服！
話說鄭若驊畀傳媒踢爆豪宅有懷疑僭建物，事件由上周六爆發至今，鄭若驊愈解釋公眾疑慮愈多，佢開頭將責任推卸晒畀上手業主，強調購入單位後冇做過結構性改動，畀人質多兩質又改口只係「室內」冇改過，結果好衰唔衰，尋日又真係有政黨研究鄭宅衞星圖後發現，天台懷疑喺入伙前後有過改動，如果指控屬實，就唔係一句「敏感度不足」可以蒙混過關，家陣好多立法會議員都要求佢解畫，就睇吓佢點拆嘞。
有人就講得啱嘞，鄭若驊本身係法律界專業人士，更加擁有工程師牌照，冇可能一句「唔知情」就置身事外，更何況相關買賣協議寫明「買方同意及接受該物業之現狀」。再講吖，鄭若驊被傳接任律政司司長，唔係今時今日嘅事，點解唔一早主動補鑊？唔係以為過咗海就係神仙吖嘛。
大家有眼見，港府高官話就話有品格審查，實際上只係走過場，形同虛設。好似鄭若驊嘅僭建問題，特首居然等到傳媒踢爆至如夢初醒，冇理由傳媒查得出，反而堂堂政府查唔出啩？唔好唔記得，林鄭之前做發展局局長時，對僭建物擺出一副「殺無赦」嘅姿態，開口埋口「僭建就是僭建，違法就是違法」，懶係義正詞嚴咁款，依家以今日的我打倒昨日的我，唔知算唔算口裏說不，身體很誠實呢？
冇計喇，香港官場禮崩樂壞，無規無矩，市民早就見怪不怪。淨係一個僭建問題，由前特首曾蔭權、到前教育局局長孫明揚、再到前食衞局局長周一嶽……十幾年嚟高官幾乎冇個清白，除咗幾年前唐唐因為「地下皇宮」而同特首寶座失諸交臂，其餘人好官我自為之，市民根本吹佢哋唔脹，有啲人坐定粒六，就係咁解。
香港地就係咁嘅啦，法律面前，窮人唯忍，當局對待僭建問題從來都係雙重標準，達官貴人宅第點樣向高空、地底發展都好，一律悉隨尊便；對無權無勢小市民就「殺無赦」，喺屋企裝個晾衫架幾乎都要又拉又鎖，擺明欺軟怕硬。
咁就難怪有人話，古人以擁有三妻四妾傲人，依家嘅香港人則以大宅有僭建物為高貴身份象徵。咁又係吖，屋企連個僭建物都冇，邊有資格學人出嚟行走江湖，大耍官威啊！