政情：愛駒未作賽先退役 吳亮星冇嚇怕

退休後繼續服務金融界

其實星爺只係十分之一個馬主，所擁有嘅為團體馬，而之前一匹名為「好心腸」嘅愛駒未落場就出現腳傷，所以未作過賽就退役囉。雖然星爺係馬主，但佢就自言只會間中入馬場，而且志在與朋友傾偈，視馬場為聚會場所喇！

星爺雖然已卸下議員身份，但並唔代表佢已退休歎世界，佢更明言好關心業界，新一年會繼續服務業界，希望幫助金融界發展，提升業界嘅資格認可，令到業界人才更充裕咁話，再加上又啱啱成功連任港區全國人大代表，難怪會明言繼續本身嘅工作喇！

咁對香港新一年有乜嘢睇法呢？星爺就話今年將有廣深港高速鐵路同港珠澳大橋啟用，直言呢啲運輸性質嘅設施開通後，就會「人通、物通、財都通」，所以香港會有好多機會咁話。希望承佢貴言喇！