政情：馬斐森自爆 無人傾續約先跳槽

港大教職員一面倒斥表現差

馬斐森嘅合約原本至明年先屆滿，而佢就較原定任期早逾一年離任，當時辭職消息一傳出，已遭港大教職員同學生炮轟不負責任。至於上星期有訪問咗逾六百名港大教職員嘅調查結果公布，發現受訪者一面倒批評其表現，更有人炮轟佢為港大歷屆最差校長添，可以話走都走得冇面過人。

喺佢任內風波不斷，好似副校長任命風波、衝擊校委會等，但佢過去已多次否認因政治壓力而劈炮，更曾經喺發送予全校師生嘅電郵中表示，離港返英涉及好多私人原因，而佢亦曾同屋企人深入商討過喎。當時就有消息指，馬斐森妻子應徵港大牙醫學院助理教授被質疑獲特別對待，最終選擇退出遴選，所以佢太太希望返回蘇格蘭工作，而馬斐森亦都有返回蘇格蘭照顧母親嘅意願。馬斐森從來無就有關說法澄清同否認，但偏偏離任在即就玩自爆。

稱任內感到來自各方壓力

馬斐森接受報章訪問推翻之前嘅離任原因，佢話五年合約已踏入第四年，但李國章仍然冇同佢討論續約事宜，所以唔肯定自己能否獲得續約，先促成跳槽至愛丁堡大學嘅決定喎。佢更指出，當初得悉愛丁堡大學對佢有興趣時，佢並唔認同需要有關工作，大賣口乖咁話港大校長一職係完美，而佢亦高興留喺港大咁話，但隨住時間變化，佢先開始考慮愛丁堡大學。

另外，佢又稱任內感來自各方嘅壓力，包括香港官員、中聯辦、校友、教職員、傳媒等，更透露中聯辦同所有大學領導層有聯絡，又形容中聯辦對香港嘅教育感到興趣，但佢就相信各方嘅出發點都係為咗大學着想。

仲記得馬斐森提出離職時，就已經有指係被李國章架空其權力所促成，但馬斐森當時就否認，仲話同李國章關係良好。但係喺最新訪問中，馬斐森就透露自己有時成為少數聲音而曾出現困難情況，今次終於講到出口，突然劈炮原來係冇人同佢傾續約。