中環出更：自嘲讀書唔叻 嚴重光未攞過獎學金
香港學生到台灣升讀大學成為潮流，亦有愈嚟愈多台灣尖子到香港讀書，港澳台灣慈善基金會（基金會）特別成立「台港教育交流基金」，設立獎學金供台港學子申請。早前舉行第一屆獎助學金頒獎典禮時，見到台北經濟文化辦事處處長嚴重光，卓妮問佢讀書時有冇攞過獎學金，佢笑稱讀書唔叻，冇機會攞喎。
嚴重光話細個讀書唔認真，所以冇機會攞獎學金。佢特別欣賞呢個獎學金唔係以成績行先，而係優先資助家境清寒嘅學生。有「電子大王」稱號嘅顧明鈞前年捐款促成「台港教育交流基金」成立，今年再加碼捐多啲，故此當日獲贈一個以佢模樣訂造嘅Q版公仔擺設，氹到佢笑得好冧。佢話當年去台灣讀大學，台灣好照顧佢，所以都要照顧返嚟香港讀書嘅台灣學生喎。佢仲笑笑口澄清唔係「電子大王」，事關佢盤電子生意已經賣晒，依家轉型做地產。
陳少霞自爆係留守兒童
基金會主席張佐民、太太張杜麗虹同女兒張兆馨都有到場。張太都好注重教育，由於工作關係，個女自細跟父母喺唔同國家住過，其中三歲至十歲期間喺智利住。張太話覺得中國人冇理由唔識中文，所以特意安排囡囡返台灣讀幾年書，然後再舉家到新加坡居住、升學。難怪識講西班牙話嘅張兆馨依家做紅酒入口生意，獨愛智利紅酒喇！
關注內地留守兒童問題嘅「愛基金」籌款委員會成員李文輝同太太陳少霞、基金會副主席陳趙滿菊都有嚟撐場。陳少霞話佢哋啱啱去咗上海籌款，成績好好，佢又自爆小時候都係留守兒童，好明白留守兒童有幾咁淒涼，所以特別想幫佢哋咁話。
卓妮