監察違法有科技 官僚執法冇決心

係人都知，本港霸地僭建問題嚴重，單靠人手巡邏往往掛一漏萬，地政總署有見及此，近年首度引入無人機協助監管寮屋違規改建，利用無人機對寮屋地貌進行航拍，以對比寮屋唔同時期嘅前後變化，一個朝早就可以收集五十公頃土地資料。相比傳統地面測量，人手兩至三個月嘅製圖工作，無人機一個星期就搞掂，效率超高。據聞該署現在着手數碼化三十八萬個寮屋管制紀錄嘅圖則，方便市民查閱。

港產官僚成日畀人話唔識與時俱進，好似鄰近深圳早已引入電子道路收費，建設機械式立體停車場，反觀港府一味加咪錶收費加牛肉乾罰款，簡直笑大人個口，地政總署今次引入現代科技協助執法，總算係一個進步。

大家可以睇到，無人機發展一日千里，用途廣泛，早就唔止攝影發燒友自娛自樂咁簡單。法國政府利用無人機成功打擊非法捕魚活動，並計劃擴大至海外屬地，事關無人機航拍清晰度高，試過有漁船掛假牌喺休漁期間非法作業，結果一樣無所遁形。美國好多城市亦唔執輸，由追捕逃犯，到喺海灘監察鯊魚蹤迹，再到風災搜索生還者，統統唔少得無人機幫手。有人形容無人機對治安執法嘅重要性，就好似二戰之後面世嘅對講機一樣，一啲都冇誇張。

當然喇，技術先進係一回事，港府有冇決心執法又係另一回事。官地被霸問題嚴重，僭建物遍地開花，問題癥結唔係勘查手段落後，而係當局有法不依，執法不嚴。呢，申訴專員公署就曾經鬧爆，地政總署處理一宗村屋霸佔官地個案，一拖竟然拖足二十年；其他官地被用作廢車場、回收場、菜園等畸士，更加係沒有最離譜，只有更離譜。

再舉一個例子，觀塘公眾避風塘被私人霸佔出租牟利，鴨脷洲等海域被私家船廠或工廠擅自出租停泊遊艇，有關亂象存在已久，基本上係公開嘅秘密，根本唔使出動高科技偵測儀器，問題係官老爺尸位素餐，懶到出汁，咁就講乜都嘥氣。最離譜係傳媒發揮第四權天職踢爆，官老爺執法仲係大歎慢板，仲有冇再不負責任啲呀。

一葉落知天下秋。港府處理官地亂象放軟手腳，對付漢奸賣港賊何嘗唔係冇氣冇力？漢奸黎被指策動佔中兼黑金禍港，鐵證如山兼有法可依，咁都可以毫髮無損，咪就係姑息養奸囉。