政情：莫乃光越南過聖誕 唔怕畀黑的劏
唔少人去越南旅行，都會擔心安全問題，而立法會資訊科技界議員莫乃光（Charles）咁啱喺早前嘅聖誕節就同家人去咗越南旅行，仲話當地嘅黑的問題都幾嚴重。咁有冇畀黑的劏先？
話說Charles一到埗，喺胡志明市嘅機場協助過關嘅職員就問佢有冇安排車去酒店，仲建議佢用手機應用程式去搵車。被問到有冇畀司機兜路呃錢，佢就話依家有全球定位系統（GPS），所以司機一兜路就即刻知，仲話一過咗個路口就即刻叫司機掉頭添！難怪佢唔擔心畀人呃啦！
鍾意去歷史戰爭博物館
Charles今次去咗越南最大城市胡志明市，有去咗當地嘅戰爭博物館同埋湄公河三角洲。佢透露，自己鍾意去啲歷史、戰爭博物館，覺得反映當地人嘅歷史，認為好值得去了解，而去到湄公河三角洲，佢仲同屋企人去咗坐艇仔添！不過佢就話嗰度啲風景都唔錯，但就唔及越南北部嘞！咁啱遇到班小朋友跳住舞唱越南話版嘅聖誕歌，佢大讚班小朋友好可愛，之後又拍咗一小段片同大家分享。