政情：泛民籌旗守護自己 懶理DQ四子生死
每年一月一日由民間人權陣線發起嘅元旦遊行都係各大政團籌款嘅機會。因為社民連梁國雄（長毛）、香港眾志羅冠聰、劉小麗同姚松炎被取消立法會議員資格（DQ），民主派為DQ四子嘅官司費成立咗「守護公義基金」，舊年嘅元旦遊行各政團都要為基金撲水，但過去一年基金掠水逾一千萬元，今年元旦遊行大部分泛民政黨嘅吸金力大跌，亦都決定為自己打算，講到明遊行籌得嘅款額將會由各黨派自己「袋袋平安」。泛民各黨派個個撳住荷包，DQ四子食自己都得喇！
元旦遊行吸金力大跌
守護公義基金喺一六年底由「佔領中環」發起人陳健民、朱耀明等成立，已籌得逾一千萬元，喺扣除DQ案原訟庭DQ四子嘅律師費後，基金現時存款為五百四十萬元。雖然嚟緊仲有長毛、小麗就DQ案上訴嘅費用、DQ案政府一方嘅訟費、違法佔領行動九名主要搞手案件等需由基金找數，不過正所謂長貧難顧，各大黨派都已表明，喺元旦遊行中籌得嘅款項都會自己落袋，唔再捐畀基金喇！而基金喺冇泛民幫拖下，今年只係籌得三十七萬元。
其實，大多泛民黨派喺今年元旦遊行嘅吸金力都大跌，跌幅最大嘅喺社民連，今年只籌到二十六萬元，較舊年籌到嘅四十萬元少十四萬元，而由黃之鋒做秘書長嘅眾志亦只籌得二十萬元，較舊年少兩萬元，民主黨（白鴿黨）同公民黨（公文袋）今年各自籌得約七萬八千元及八萬元，而白鴿黨較舊年多咗近兩萬元，公文袋則少咗一萬元。
基金「公義」龍門任搬
泛民政黨喺過去幾次遊行都將籌得嘅款額捐畀守護公義基金，但今次元旦遊行就斬纜。社民連主席吳文遠話佢哋本身都有好多官司喺身，所以今年就要「守護自己公義」，將籌得款項留畀自己作律師費。唔止社民連撳住荷包唔放，白鴿黨、公文袋都一樣，就連眾志都話會留嚟黨務用、立法會追討議員薪津同政治檢控案件嘅法律費用。
守護公義基金唔止靠遊行「掠水」，更加係龍門任佢搬，事關原本話籌得款項係支援DQ四子，點知又轉口話要改為幫佔中九子案籌款。咁搞法真係唔知幫得幾耐，難怪大家都抽身走人啦！