中環出更：熱廚房多嘢忙 陳浩濂畀老婆囡囡詐型
做議員忙定係做官忙？財經事務及庫務局副局長陳浩濂（Joseph）一定覺得做官忙啲。佢話做咗副局長後，冇時間幫兩個女兒溫書，搞到太太都有啲「詐型」，連女兒都投訴佢少咗時間見面呀！
農曆新年都唔打算放假
Joseph未做官前，身兼投行董事總經理同中西區區議員，當時已經冇乜時間陪兩個女兒，淨係負責幫手溫數學，點知依家連數學都唔得閒教添！佢話唔單止太太有啲「詐型」，連兩個女兒都投訴少咗見佢。佢又話以前嘅時間較彈性，會把握時間送女兒返學，依家就冇辦法送返學，加上夜晚又多活動，惟有盡早趕返屋企，喺兩個女兒瞓覺前，同佢哋講聲晚安啦！聽落真係冇乜時間陪家人喎，難怪太太同兩個女兒都投訴佢喇！
入咗熱廚房後，Joseph話自己上任以來淨係請咗一次假，而且嗰次放假都係繼續工作，聖誕亦冇得放，連農曆新年亦唔打算放，佢話啱啱上任，所有工作都想跟緊啲喎。
卓妮