踏入新一年，唔少人都希望香港多啲和諧，少啲爭拗，還市民耳根清淨，只可惜事與願違，反對派尋日例行公事發動遊行，雖然捧場客唔多，但嘈喧巴閉兼霸住成個鬧市，市民難得假期想一家大細行吓街都唔得，都咪話唔乞人憎！
講起都好笑，民陣今年出盡吃奶之力號召人上街，實行嚟個訴求炒雜燴，除咗主打嘅反一地兩檢，其他如「財團壟斷」以至「粗暴規劃」等，五花八門，結果連民陣自己公布、一向被視為有嚴重水分嘅數字都係得一萬人咁大把，同過往動輒話有十幾萬、幾十萬人相比，根本不可同日而語。反對派成日靠嚇，郁吓就話一國兩制已死，郁吓就話威權殺到嚟，講到香港水深火熱、市民就快揭竿起義咁款，家陣吹行雞都冇乜人騷，來來去去嗰班老面孔，示威變示弱，北大人仲唔掩住半邊嘴笑？
講真，港府施政甩漏多多，淨係坐視假難民禍港成為治安毒瘤，已經激起極大民怨，反對派咁都叫唔郁市民上街，證明喺「不得人心」方面，班政棍同特衰政府只係五十步笑百步。事實又係喎，咁多年嚟無良政棍有破壞冇建設，特別嗰班垃圾會議員，唔係拉布就係流會，幾時有做過正經事？尋日有團體公布中學生十大新聞選舉，結果只有一單政治新聞上榜，可見連血氣方剛、激情洋溢嘅年輕人都頂班政客唔順。
話時話，反對派五日一遊行，十日一集會，元旦又嚟，五一、七一、九二八、十一又嚟，年年如是，沒完沒了，係人都厭。佢哋之所以樂此不疲，一來吸引眼球博曝光，為參選造勢；二來趁機擺街站籌旗乞錢，咁多年嚟市民早就睇穿佢哋籠嘢，唔會再輕易落疊。
反對派成事不足都算嘞，為反而反，唯恐天下不亂嗰度先至乞人憎。明明高鐵係好嘢，一地兩檢都係好嘢，主流民意樂觀其成，點知呢班人偏偏與民為敵，為咗抹黑一地兩檢，無所不用其極，甚至連自編自導「越境執法」鬧劇嘅屎橋都出埋。大家睇到喇，反對派置主流民意於不顧，仲話「泛民主派」喎，改名「反民主派」就差唔多！
鬼咩，係人都知成班反對派政客嘅老闆並唔係選民，而係大金主漢奸黎同埋佢背後嘅外部勢力。呢，「爛果報」今年一如既往，瞓身催谷元旦遊行，結果大收冷場，證明公道自在人心，漢奸黎反中亂港打橫行，確係神憎鬼厭。
始終都係嗰句︰擒賊先擒王，打蛇打七寸。一日唔清算賣港賊策動佔中、黑金禍港嘅罪行，香港一日都唔使旨意有運行！