政情：段崇智履新中大校長 表明開誠布公
香港土生土長嘅國際著名生物醫學學者段崇智尋日接替卸任嘅沈祖堯，就任中文大學校長一職。段崇智隨後向全體師生發信，指首要而莊嚴嘅任務，係秉持中大創校原則、使命同核心價值，帶領中大竿頭日進。
段崇智又話，對於獲委任感到榮幸，表明會以服務為職志，以身作則，開誠布公，實踐和而不同嘅團隊精神，又希望將來能夠喺唔同場合，了解師生學習及工作情況，聆聽佢哋對中大未來發展嘅意見。
承諾聆聽師生意見
還記得段崇智上任前夕曾惹來外界耳語，其中一個原因係擔心段崇智長居外地，本身對香港社會及政治環境唔熟悉，今次段崇智甫上任就表明會聆聽師生對中大未來發展嘅意見，直接回應咗外界嘅擔心，加上沈祖堯早前亦力撐段對大學工作好熟悉，究竟段崇智日後有乜橋同中大師生保持良性溝通互動，大家要拭目以待嘞！