政情：泛民初選 票站欠中立 未投先內訌
立法會四席補選將於三月十一日舉行，至於民主派就今次補選舉行嘅新界東同九龍西初選，就訂於本月十四日進行實體投票，即係仲有唔夠兩個星期就舉行。不過，據聞民主派喺尋找實體投票站方面遇到困難，可能被迫使用一啲「非中立場地」供市民投票，包括一個設於中文大學校園內嘅會堂，以及最少一個屬於民協嘅社區服務中心，令其中兩名參選人前中大學生會會長張秀賢同民協前立法會議員馮檢基，變相擁有主場之利，引起其他參選人不滿。
民主派初選分為三部分，包括民意調查、實體投票同組織投票，前兩者比重各佔四成半，後者只佔一成，當中民調結果受各名參選人嘅知名度同往績影響，好難喺短期內出現巨變，組織票則屬各參與政團嘅政治決定，參選人同樣可做嘅不多，至於變數最大、最有機會畀落後者翻盤嘅，就係餘下嘅實體投票。
張秀賢馮檢基主場之利
有參選人估計，由於今次初選係民主派內部嘅「小圈子選舉」，估計主要只會有兩類人會投票。其一係「深黃」民主派支持者，無論實體票站設喺邊區，佢哋都會專程坐車去投票。其二係住得好近票站嘅「淺黃」支持者或一般市民，佢哋見個票站設喺屋企附近，又或者咁啱行經票站門口，先會願意花時間走入去投票，因此實體票站設喺邊度，對初選結果可能有頗大影響。
民主派由於資源不足，只會喺包括四個區議會選區嘅新東設立四個實體票站，有三個區議會嘅九西則設立三個票站，首選為啲親泛民宗教團體轄下嘅場地，但由於投票日為周日，好多場地都要舉辦宗教活動，其他中立團體亦因種種理由拒絕借場，最後可能被迫使用一啲「非中立場地」做票站，包括中大同民協嘅場地。
張秀賢做過中大學生會會長，佢嘅支持者又以年輕人同學者居多，喺中大投票自然對佢有利。同一道理，住喺民協社區中心附近嘅居民，支持馮檢基出戰補選嘅機會較高。
倘未達共識 變相益建制
負責舉辦初選嘅民主動力強調，仍在努力尋找中立場地作為票站，但據悉已有參選人預先就有關安排表達不滿，若各方最後未能就票站問題達成共識，整個初選隨時搞唔成，又或者搞得成都畀人質疑唔夠中立，繼而拒絕承認投票結果，堅持自行參加補選，變相令建制派候選人得益。