中環出更：顧客愛親身試錶 梁青華未懼網店威脅

剛踏入二○一八年，尋日就有唔少名人去咗沙田馬場觀賞元旦賽馬日賽事。對於最新零售市道情況，梁青華認為，目前零售市場仍處於復甦當中，同八年前嘅高峰期仲有段距離，佢希望新一年社會可以和諧啲，最好可以解決到房屋問題咁話。

邱達昌樂見亞視轉營網絡

對於大行其道網購所帶來嘅威脅，梁青華分析，實體店舖仍然係奢侈品嘅主要銷售渠道，因為顧客鍾意親身試戴手錶，而且香港地方細，港人上網睇完相關產品資訊後，可以好方便就去到實體店舖購物，有別於幅員廣闊嘅內地，難怪佢咁有信心暫時唔會畀網店取代喇！

同場仲有遠東發展主席邱達昌，女兒邱詠麒同兒子邱華瑋一齊入馬場。邱達昌父親為亞洲電視前主席邱德根，所以同香港嘅電視業關係密切，邱達昌直言對亞視有感情，樂見亞視改以網絡電視形式營運，佢相信需要一段時間先能夠做出成績。

邱達昌（右）認為電視業結合網絡發展係大趨勢，圖左為邱華瑋。

姚君達（右）同太太一齊到馬場迎新年。

姚君達諗新方向發展業務

邱達昌解釋，港人習慣睇電視多於用手機，而且呢種習慣根深柢固，觀眾需要時間先能夠改變，佢又表明，香港任何一間電視台長遠都會需要發展網絡。

另外，米蘭站前主席姚君達舊年辭去主席一職，近期就專注財務公司業務，佢認為依家樓價熾熱，競爭對手又進取，所以要諗出新嘅方向繼續發展，好似目前就有全港首創嘅手袋同股票貸款，唔知佢下一步又有乜新構思呢？

卓妮