無牌記協扮判官 自問自答唔知醜

話說早排中大宿舍一名韓籍男生懷疑take嘢後裸跑兼非禮女同學，全城震驚，本報即時發揮第四權監察天職，派記者直擊涉事宿舍保安漏洞，點知中大學生會反應過敏，唔單止「譴責」本報「侵犯私隱」，仲走去向記協告狀。最好笑嘅係，記協又真係當正自己魚蝦蟹，煞有介事咁由所謂操守委員會「調查」一番，仲要自問自答話投訴不成立喎，仲有冇無聊啲吖。

本報記者揭醜揭弊手法專業，有口皆碑，而對於中大單嘢，本報亦一早回應得清清楚楚，大學宿舍保安問題涉及公眾利益，市民絕對有知情權，而類似偵查報道更加係國際慣例。再講吖，記者一冇影到同學容貌，二冇影到私人設施，保護私隱工作做到十足十，成單嘢黑白分明，記協嘅「調查」根本就係脫褲子放屁──多此一舉。

好心啲人冇鏡都搵盆水照吓自己啦，一個小圈子組織，來來去去都係熟口熟面嗰幾件，既冇認受性，更冇代表性，根本冇資格「調查」本報。不過你咪理，呢個世界就係充斥住一班揸住雞毛當令箭嘅跳樑小丑，當正自己係判官，記協係咁，嗰個乜鬼香港報業評議會又係咁，幾條友坐埋一齊圍爐自high，居然好意思喺度也文也武，簡直就係新聞界嘅敗類。

功夫茶正告記協，既然你哋咁鍾意「主持公道」，唔該跟一跟漢奸黎粗口辱罵兼恐嚇本報記者嗰單嘢。不過嘥氣喇，漢奸黎身為傳媒老闆，公然妨礙新聞自由，記協起初潛水扮盲，後來抵唔住洶湧群情，至死死地氣發個搲痕都冇力嘅聲明，求其叫記者報警就算，甚至連漢奸黎個名都唔敢提；仲有吖，淫媒搞假自僱，真裁員，記協又係小罵大幫忙。鬼咩，走狗從來唔會咬餵佢嘅主人，記協又點可能「大義滅親」吖。孔子曰︰必也正名乎。唔該記協咪再掛住「香港」title欺世盜名，索性改名「淫媒記者協會」、「爛果記者協會」罷喇！

香港地就係咁嘅嘞，反中亂港無人問，愛國愛港畀人搞。政府部門多年輪番上陣，無理針對打壓，東方驚都未驚過，亦唔在乎多一個記協呢類「漢奸外圍組織」。一眾打手及小丑，有牌又好無牌也罷，有種嘅即管放馬過嚟，功夫茶等住你！