立法會喺聖誕節休會前通過建制派就杜絕民主派拉布提出嘅修改《議事規則》議案，民主派喺修規議案通過後已立即表明會「百倍奉還」。立法會將喺下月十日復會，政府已公布會於當日會議提交有關利得稅兩級制嘅條例草案，未知會否成為民主派修規後還擊嘅武器。不過據了解，民主派對利得稅兩級制措施並唔反對，但就已開始醞釀修改《議事規則》第二波，修改《議事規則》之戰隨時再爆發。
政府尋日公布下月十日提交有關利得稅兩級制嘅條例草案。專業議政會計界立法會議員梁繼昌（Kenneth）話實施利得稅兩級制，受惠嘅係細嘅企業，條例草案部分亦同國際稅務有關，對香港競爭力好重要，所以睇唔到要阻撓嘅原因。但立法會早前通過修改《議事規則》係太倉促，而且修改後嘅《議事規則》亦唔完善，所以佢將會喺未來兩、三個月內，再就《議事規則》提出修訂，明言修改《議事規則》一事並唔係咁就「完咗」。
Kenneth又話佢修改《議事規則》係為咗令議會暢順運作，所以佢會爭取包括建制派在內嘅各黨派支持。至於係乜嘢葫蘆賣乜嘢藥？就要到時先知喇！