政情：不獲浸大續約 王凱峰指政治干預
曾參與啱啱過去嘅第十三屆港區全國人大代表選舉、浸會大學民選校董、浸大生物系研究助理教授王凱峰尋日召開記者會話早前收到可靠消息，指不獲其上司、浸大生物系內地植物學家夏亦薺續約，但佢透露曾喺今年九月已獲夏亦薺口頭承諾將獲續約，而且自己亦獲得研究資助局約一百二十六萬港元嘅優配研究金，符合續約要求，再加上冇發生過紀律問題，估計不獲續約與參選人大有關。
稱與早前參選人大有關
王凱峰喺記者會上更播出聲稱係同夏亦薺對話嘅錄音，錄音中有一把男聲表示「We will support and recommand your extention.（我們會支持和推薦你的續約）」。但佢話喺本月初收到了解有關佢續約進度嘅人士透露，夏已書面去信理學院指唔同佢續約，而最新嘅消息為理學院已核准夏嘅決定，有關文件將送往副校長同校長。
佢又話喺校董會嘅文件上說明，續約嘅其中一個標準係取得研究撥款，而佢獲得資助研究糖尿病同脂肪肝嘅藥物，撥款完成日為一九年八月，但其合約將喺明年八月完結，如最終未能續約，研究項目將爛尾，亦有四人受影響。佢又指過去喺參選人大期間，曾有校外勢力唔想佢參選，但未有透露所指嘅勢力內容。
浸大回應時強調考慮與研究助理教授續約時，主要參考其工作表現、學院∕學系人手編配嘅需求同財政狀況等，唔會考慮任何政治因素，亦唔存在外界干預。