政情：自由黨收「大禮」唱衰標語貼通街

中西區區議會山頂選區原議員係自由黨嘅陳浩濂，佢入咗政府熱廚房做財經事務及庫務局副局長，所以要辭去區議員職務，政府就喺上月二十六日搞補選，自由黨派出教育局前政助楊哲安參選，同曾參加佔領行動、屬於民主派嘅「2047香港監察」召集人錢志健對壘。選舉當日兩人都落力拉票，各自搵嚟建制同泛民政界重量級人士幫拖，力爭出線，做個議員「插班生」。最終楊哲安以一千三百七十八票，以大比數擊敗僅取得三百九十四票嘅錢志健。

建制料與近日補選有關

選舉至今已落幕一個月，期間一直風平浪靜，楊哲安就密密做地區工作，又成日話要做好「插班生」，學吓區議會嘅工作流程，其他乜都唔理住。正當大家開開心心慶祝緊聖誕嘅時候，港九各區包括山頂麥當勞道、紅隧行人天橋、旺角新世紀廣場巴士站、中環閣麟街等，都出現批評自由黨嘅標語。有建制人士就估計，可能同補選結果有關，搞到一班「深黃」人士好不滿，所以做出呢啲事嚟攻擊自由黨。

自由黨已就事件報警

負責報警嘅自由黨副主席邵家輝就話有朋友喺麥當勞道住，周二晚見到喺街有路牌畀人貼咗標語，就即刻通知佢，點知之後發現中環同紅隧附近都有，翌日早上佢通知路政署去拆標語同埋報警。知唔知乜嘢人做，係咪同補選有關？佢就笑住話「補選又選完」，都唔知乜嘢人咁無聊同嘥時間，做埋啲咁嘅嘢，依家都評估緊係乜嘢人做。

自由黨黨魁鍾國斌就話好難去估計邊個做，直言「香港又有，旺角又有，點樣估」，通街都有嘅時候，除非有天眼影到，唔係就唔知邊個做，「乜人都有可能」，件事交畀警察去處理。警方回覆查詢時，指警方接報到場後，認為事件不涉及刑事成分，案件列作投訴滋擾處理。